“YENİ NƏFƏS”DƏ NƏFƏS ALMAQ ÜÇÜN…
Artıq üç ildir ki, Azərbaycandan “Yeni Nəfəs” Hərəkatının nəfəsi gəlir. Zəif və güclülüyündən asılı olmayaraq məmləkətdə bir sıra millətçi təşkilatların fəaliyyəti mövcuddur. Bəs “Yeni Nəfəs” –in digərlərindən fərqi nədir və ya onun özəl xüsusiyyətlərini hansı məsələlər təşkil edir?
İlk öncə “Yeni Nəfəs” Hərəkatının yaranma səbəblərinə toxunaq. Digərlərindən fərqli olaraq biz hər hansı bir təşkilat yaratmağı qarşımıza məqsəd qoymadıq. Biz əsas amal olaraq millət, vətən və dövlət yolunda xidmət göstərməyə başladıq. Artıq elə bir zamanın gəlib çatdığını gördük ki, bir təşkilatın işini həyata keçiririk. Buna görə də fəaliyyətimizi sistemləşdirmək və rəsmiləşdirmək üçün “Yeni Nəfəs” Hərəkatını yaratdıq. Ona görə yaratdıq ki, Bütöv Azərbaycana, Turana yeni nəfəs gətirək. Bu işdə nəfəsimizin nə zaman kəsiləcəyini və ya kəsdiriləcəyini düşünmədik. Çünki biz bu yola sonu düşünmədən atıldıq. Sonu düşünmədən də mübarizə apardıq və hələ də mübarizəmizi davam etdirməkdəyik. Ona görə sonu düşünmədik ki, bizim üçün əsas gedilən yoldur. Əgər o yol şərəflidirsə, demək şərəfli yolda hər şeyə hazır olmalısan. Hətta insanların ən çox qorxduğu ölümə belə. Düzdür bizim fikrimizə görə milləti yaşatmaq üçün yaşamaq lazımdır. Amma biz bu yaşam tərzini də ölümü hər an qəbul etməyə hazır bir insan kimi yaşayırıq.
Hətta biz türk millətçiliyinin özünə belə yeni nəfəs gətirməyi qarşımıza məqsəd qoyduq. Çünki Azərbaycan cəmiyyətində türkçülüyün mahiyyətini anlayan toplum şəkildə elə bir qüvvə yoxdur. Bəziləri türkçülüyü şöhrət xatirinə, bəziləri gəlir mənbəyinə çevirib qabartmaqla məşğuldurlar. Demək məqsəd şöhrət və gəlir əldə etmək, vasitə isə türkçülük. Türkçülüyü alver vasitəsinə çevirən bu insanlar pul aldıqları mənbədən gələn göstərişlərlə fəaliyyət göstərir. Heç dostla düşmən arasında fərq qoymağı belə bacarmırlar. Kimin bu millətə, kimin isə onun düşməninə... Bizə görə məqsəd türk millətçiliyi, vasitələrsə müxtəlif ola bilər. Yəni məqsədimiz birdir-türk millətinə, vətəninə, dövlətinə xidmət etmək. Vasitələr isə dəyişən, yeniləşən, bir şəkildən digər şəklə düşən bir anlayışdır “Yeni Nəfəs” üçün. Ayrı-ayrı qüvvələr “Yeni Nəfəs”- i öz tərəflərinə çəkməyə, bu alınmayanda isə ona ləkə atmağa çalışdılar. Çalışdılar və çalışırlar. Amma çirkin məqsədlərinə nail olmadılar, olmurlar və olmayacaqlar da. Çünki onlar “Yeni Nəfəs”-ə istifadə olunan vasitələrə görə ləkə atmağa çalışdılar və yuxarıda qeyd etdiyim kimi bu vasitələr dəyişən kimi onların cılız istəyi və planları puça çıxdı. Sonradan başladılar ki, bəs “Yeni Nəfəs” bu qədər işlər görürsə pulu haradan alır? Daha anlamırlar ki, bu həyatda nə isə etmək üçün ilk öncə onu istəməli və bu istək uğrunda saf niyyətlə çalışmalısan. Ən əsası öz istəyinin nə qədər doğru və reallığa uyğun olduğunu insanlara inandırmalısan. Bir sözlə insanları o “xəstəliyə” elə yoluxdurmalısan ki, istəsə belə ondan qurtula bilməsin.
“Yeni Nəfəs” üçün əsas prioritet millət, vətən, və dövlət anlayışıdır. Bu amalı həyat fəlsəfəsinə çevirən və onun uğrunda çalışan, vuruşan istənilən qüvvə ilə birlikdə mücadilə aparmağı özümüzə şərəf duyuruq. Çünki güclü olmaq üçün çalışırıq. Unutmaq olmaz ki, güclər həmişə güclüləri dəstəkləyir. Güclü olmaq isə bizim öz əlimizdədir.
Biz “Yeni Nəfəs” olaraq heç bir millətə, etnikə və ya qüvvəyə qarşı olmadıq və deyilik də. Biz bizə, yəni uca millətimizə qarşı olanlara qarşıyıq. Necə ki, Azərbaycanımızın güneyini işğal edən, qırx milyon türkü Tanrı tərəfindən ona verilən haqdan məhrum edən fars şovinistlərinə qarşı. Eləcə də vəhşilikdə onlardan geri qalmayan, uzun müddət Quzey Azərbaycanı əsarətdə saxlayıb, onun ayrı-ayrı hissələrini öz maşası erməni qaniçənlərinə hədiyyə edən rus şovinistlərinə qarşı. Bütün bunlara görə bizim hədəfimiz nəzarətimizdə olan 18% ərazidən istifadə etməklə digər torpaqlarımızı geri qaytarmaqdır. Çünki əhalisinin 4/5 hissəsi əsarətdə olan bir məmləkətin vətəndaşının mən xoşbəxtəm deməyə haqqı və xilas olmaq üçün sadaladıqlarımdan başqa çıxış yolu yoxdur. Bunun ilkin yolu insanların beynində inqilab edərək bütövlük düşüncəsini formalaşdırmaqdan keçir ki, biz də bunu edirik. Böyük Türk mütəfəkkiri İsmayıl bəy Qaspirali demişkən: “Dildə, Fikirdə və İşdə birlik”. Yəni biz Azərbaycan türkləri olaraq dildə və fikirdə bir olmalıyıq ki, bu birliyin əməldə əksini tapmasında heç bir problem olmasın. Bütün bunlar və növbəti yazılarda vurğulanacaq fikirlər “Yeni Nəfəs” də nəfəs almağın əsas şərtləridir.
NƏFƏSİNİZ GƏLSİN!!!
Mövzu: YENI NEFES VE SIZ 
Çər. May 21, 2008 6:48 pm
